Page 136

1. antfahen fader iuuua· ac gi an that fiur sculun· an thene diopun dod·
   
2. diublun thionon. uuredun uuidersakun. huand gi so uuarhtun bi uoran·
   
3. Than aftar them uuordun. skedit that uuerod an tue. thea godun
   
4. endi thea ubilon. farad thea fargriponon man. an thea hetan hel· hriuuig-
   
5. mode. thea faruuarhton uueros· uuiti antfahat. ubil endilos. Ledid
   
6. up thanen· her hebencuning. thea hluttaron theoda. an that langsame
   
7. lioht. thar is lif euuig. gigareuuid godes riki. godaro thiado. (LIV.)
   
8. So gefragn ik that thém rinkun tho· riki drohtin· umbi thesaro
   
9. uueroldes giuuand· uuordun talde. huo thiu ford ferid. than
   
10. lango the sie firiho barn· ardon motun. ia huo siu an themu endie
    
11. scal· tegliden endi tegangen. He sagde ok is iungarun thar· uua-
    
12. run uuordun. huat gi uuitun alle quad he. that nu obar tua naht.
    
13. sind tidi kumana. giudeono pascha. that sie sculun iro gode thio-
    
14. non. uueros an themu uuihe. thes nis geuuand enig. that thar uuir-
    
15. did mannes sunu· te theru meginthiodu· craftag farkopot. endi
    
16. an cruce aflagan. tholod thiadquala. Tho uuard thar thegan ma-
    
17. nag. slidmod gisamnod. sudarliudi· iudeono gumscepi. thar sie
    
18. scoldun iro gode thionon. uurdun eosagon· alle kumane. an huuarf
    
19. uueros· the sie tho uuisostun· undar theru menegi· manno taldun·
    
20. craftag kuniburd. Thar caiphas uuas· biscop thero liudio. sie
    
21. redun tho an that barn godes· huo sie ina asluogin· sundea losan.
    
22. quad that sie ina an themu helagon daga· hrinen ni scoldin.
    
23. undar thero manno menegi. that ni uuerde thius meginthioda·
    
24. helidos an hroru. huand ina thit heriscepi uuili· farstanden