Page 134

1. adelien aftar iro dadiun. Than skedid he thea farduanan man·
   
2. thea faruuarhton uueros. an thea uuinistron hand. So duot he ok
   
3. thea saligon· an thea suitheron half. grotid he than thea godun· endi
   
4. im tegegnes sprikid. Kumad gi quidid he thea thar gikorene
   
5. sindun. endi antfahad thit craftiga riki· that gode that thar gi-
   
6. gereuuid stendid. that thar uuard gumono barnun· giuuarht
   
7. fan thesaro uueroldes endie. Iu habad geuuihid selbo. fader allaro
   
8. firiho barno. gi motun thesaro frumono neotan. geuualdon theses
   
9. uuidon rikeas. huand gi oft minan uuilleon frumidun. fulgen-
   
10. gun mi gerno. endi uuarun mi iuuuaro gebo mildie. than ik
    
11. bithuungan uuas· thurstu endi hungru. frostu bifangan. eftho
    
12. an feteron lag. biklemmid an karkare. oft uurdun mi kumana
    
13. tharod. helpa fan iuuun handun. gi uuarun mi an iuuuomu hugi
    
14. mildie. uuisodun min uuerdlico. Than sprikid imu eft that uuerod
    
15. angegin. Fro min the godo quedat sie. huan uuari thu bifangan
    
16. so. bethuungan an sulicun tharabun. so thu for a thesaru thiod telis·
    
17. mahtig menis. Huan gisah thi man enig· bethuungen an sulicun
    
18. tharabun. huat thu habes allaro thiodo giuuald. Iac so samo thero
    
19. medmo. thero the io manno barn. geuunnun an thesaro uueroldi.
    
20. Than sprikid im eft uualdand god. So huat so gi dadun quidit he·
    
21. an iuuues drohtines namon. gódes fargábun an godes era. them
    
22. mannun the her minniston sindun. thero nu undar thesaru menegi
    
23. standid. endi thurh odmodi· arme uuarun. uueros huand sie
    
24. minan uuilleon fremidun. so huat so gi im iuuuaro uuelono