Page 112

1. that sie sinlib· gisehen mostin. Open euuig lioht. endi anfaren·
   
2. an thiu berhtun bu. That mendun thea blindun man. the
   
3. thar bi hierichoburg. te themu godes barne. hludo hriopun·
   
4. that he im iro heli farlihi. liohtes an thesumu libe. than im thea
   
5. liudi so filu· uueridun mid uuordun. thea thar an themu uuege
   
6. forun. bi foren endi bi hinden. So dot thea firinsundeon· an
   
7. thesaru middilgard. mankunnie. Horiad nu huo thie blin-
   
8. dun· sidur im gibotid uuard. that sie sunnun lioht· gesehen
   
9. mostun. huo sie tho dadun. Geuuitun im mid iro drohtine sa-
   
10. mad. folgodun is ferdi· sprakun filu uuordo. themu landes
    
11. hirdie te lobe. So dod im noh liudio barn· uuido aftar thesaru
    
12. uueroldi. sidur im uualdand god· geliuhte mid is lerun. endi
    
13. im lif euuig· godes riki fargaf. godun mannun. hoh himiles
    
14. lioht. endi is helpe thar to. so huemu so that giuuerkod. that
    
15. he moti themu is uuege folgon.
    
16. (XLV.) Tho nahide· neriendo crist· the godo te hierusalem. quam
    
17. imu thar tegegnes filu· uuerodes an uuilleon. uuel huggendies.
    
18. Antfengun ina fagaro· endi imu biuoren streidun· thene uueg
    
19. mid iro giuuadiun. endi mid uurtiun so same· mid berhtun blo-
    
20. mun. endi mid bomo togun. that feld mid fagaron palmun·
    
21. al so is fard geburide· that the godes sunu· gangan uuelde. te theru
    
22. marean burg. huarf ina megin umbi· liudio an lustun. endi
    
23. lossang hof. that uuerod an uuilleon. sagdun uualdande thank·
    
24. thes thar selbo quam· sunu dauides. uuison thes uuerodes.