Page 152

1. endi an thinaru uuison· that thu theses uuerodes ni bist. ac thu bist
   
2. galileisk man. He ni uuelda thes tho gehan eouuiht. ac stod tho
   
3. endi stridda. endi starcan ed· suidlico gesuor. that he thes gesides
   
4. ni uuari. Ni habda is uuordo giuuald. it scolde giuuerden so. so it
   
5. the gemarcode. the mancunnies· faruuardot an thesaru uueroldi.
   
6. Tho quam imu ok an themu huuarbe to. thes mannes maguuini· the
   
7. he er mid is makeo giheu. suerdu thiu scarpon. quad that he ina sahi
   
8. thar. an themu berge uppan. thar uui an themu homgardon· herron
   
9. thinumu· hendi bundun. fastnodun is folmos. He tho thurh forhtan
   
10. hugi. forlognide thes is liobes herron. quad that he uueldi uue-
    
11. san thes libes scolo. ef it mahti enig thar· irminmanno. giseggian
    
12. te sodan· that he thes gesides uuari. folgodi theru ferdi. || Tho uuard
    
13. an thena formon sid. hanocrad afhaben. Tho sah the helago crist·
    
14. barno that bezte. thar he gebunden stod. selbo te simon petruse.
    
15. sunu drohtines. te themu erle obar is ahsla. Tho uuard imu an
    
16. innan san· simon petruse. ser an is mode. harm an is hertan. endi
    
17. is hugi drobi. suido uuard imu an sorgun. that he er selbo gesprak.
    
18. gihugde thero uuordo tho. the imu er uualdand krist. selbo sagda.
    
19. that he an theru suartan naht. er hanocradi· is herron scoldi· thriuuo
    
20. farlognien. Thes thram imu innan mod. bittro an is breostun.
    
21. endi geng imu tho gibolgan thanen· the man san theru menigi· an
    
22. modkaru· suido an sorgun· endi is selbes uuord· uuamscefti uueop.
    
23. antat imu uuallan quamun. thurh thea hertcara. hete trahni.
    
24. blodage fan is breostun. He ni uuande that he is mahti gibotien