Page 149

1. farhauuan. he uuard an that hobid uund. that imu herudrorag·
   
2. hlear endi ore· beni uundun brast. blod aftar sprang· uuell fan
   
3. uundun. Tho uuas an is uuangun scard. the furisto thero fiundo·
   
4. tho stod that folc an rum. andredun im thes billes biti. || Tho sprak
   
5. that barn godes. selbo te simon petruse. het that he is suerd dedi·
   
6. skarp an skedia. Ef ik uuid thesa scola uueldi quad he. uuid
   
7. theses uuerodes geuuin. uuigsaca frummien. than manodi
   
8. ik thene mareon· mahtigne god. helagne fader· an himilri-
   
9. kea. that he mi so managan engil herod· obana sandi. uui-
   
10. ges so uuisen. so ni mahtin iro uuapantreki· man adrogen. iro
    
11. ni stodi gio sulic megin samad. folkes gifastnost. that im
    
12. iro ferh aftar thiu. uuerden mahti. Ac it habad uualdand god.
    
13. alomahtig fader. an odar gimarkot. that uui githoloian sculun.
    
14. so huat so us thius thiod. to bittres brengit. Ni sculun us belgan
    
15. uuiht. uuredean uuid iro geuuinne. huand so hue so uuapno
    
16. nid. grimman gerheti uuili· gerno frummien. he suiltit imu
    
17. oft· suerdes eggiun. dot im bidroregan. Uui mid usun dadiun
    
18. ni sculun. uuiht auuerdian. || Geng he tho te themu uundon
    
19. manne. legde mid listiun· lik tesamne. hobiduundon. that siu
    
20. san gihelid uuard. thes billes biti. endi sprak that barn godes.
    
21. uuid that uurede uuerod. Mi thunkid uunder mikil quad he.
    
22. ef gi mi ledes uuiht· lestien uueldun. hui gi mi tho ni fengun·
    
23. than ik undar iuuuomu foke stod. an themu uuihe innan. endi
    
24. thar uuord manag. sodlic sagde. than uuas sunnon skin. diurlic