Page 131

1. thesaro uueroldes giscapu. teglidid groni gang.
   
2. Tho gengun imu is iungaron to· fragodun ina so stillo. Huo lango
   
3. scal standen noh quadun sie· thius uuerold an uunniun. er than
   
4. that giuuand kume. that the lasto dag· liohtes skine. thurh uuolcan-
   
5. skion. estho huan is eft thin uuan kumen· an thenne middilgard.
   
6. mankunni· te adomienne. dodun endi quikun. fro min the godo· us is
   
7. thes firiuuit mikil· uualdandeo krist. huan that giuuerden sculi.
   
8. (LII.) Tho im anduuordi· alouualdo krist· godlic fargaf. them gumun selbo.
   
9. That habad so bidernid quad he. drohtin the godo. Iac so hardo farholen.
   
10. himilrikies fader· uualdand thesaro uueroldes. so that uuiten ni mag·
    
11. enig mannisc barn· huan thiu marie tid· giuuirdid an thesaru uueroldi.
    
12. Ne it ok te uuaran ni kunnun· godes engilos. thie for imu geginuuarde·
    
13. simlun sindun. sie it ok gisegg(I)an ni mugun. te uuaran mid iro uuor-
    
14. dun. huan that giuuerden sculi. that he uuillie an thesan middilgard·
    
15. mahtig drohtin· firiho fandon. Fader uuet it eno· helag fan himile·
    
16. elcur is it biholen allun. quikun endi dodun· huan is kumi uuerdad.
    
17. Ik mag iu thoh gitellien· huilic her tecan bi uoran· giuuerdad uunderlic.
    
18. er ‡ he an these uuerold kume. an themu mareon daga· that uuirdid her
    
19. er an themu manon skin. Iac an theru sunnon so same. Gisuerkad
    
20. siu bethiu· mid finistre uuerdad bifangan. fallad sterron. huit heben-
    
21. tungal. endi hrisid erde. Eiuod thius brede uuerold. uuirdid sulicaro
    
22. bokno filu. grimmid the groto seo. uuirkid thie gebenes strom. egison
    
23. mid is udiun· erdbuandiun. Than thorrot thiu thiod. thurh that
    
24. gethuing mikil. folc thurh thea forhta. than nis fridu huergin.