Page 127

1. Mi thunkid uunder mikil quad he. mari thioda· gi kunnun ma-
   
2. nages gisked. hui gi that te uuarun ni uuitin. uuerod iudeono.
   
3. that her is betera rad. barno gehuilicumu· that man her enne
   
4. man· aldru bilosie. endi that he thurh iuuua dadi· droreg sterbe.
   
5. for thesumu folcskepi. ferah farlate. than al thit liuduuerod·
   
6. farloren uuerde. || Ni uuas it thoh is uuillean· that he so uuar ge-
   
7. sprak. so ford for themu folke. frume mankunnies· gimende
   
8. for theru menegi. ac it quam imu fan theru maht godes. thurh
   
9. is helagan hed. huand he that hus godes· thar an hierusalem·
   
10. bigangan scolde. uuardon thes uuihes. be thiu he so uuar gisprak·
    
11. biscop thero liudio. huo scoldi that barn godes· alla irminthiod.
    
12. mid is enes ferhe. mid is libu alosien. That uuas allaro the-
    
13. saro liudio rad. huand he gihalode mid thiu· hethina liudi.
    
14. uueros an is uuilleon. uualdandio crist. || Tho uurdun enuuor-
    
15. die· obarmodie man. uuerod iudeono· endi an iro huarbe gispra-
    
16. kun· mari thioda. that sie im ni letin iro mod tuehon.
    
17. so hue so ina undar themu folke· finden mahti· that ‡ ina san gi-
    
18. fengi. endi ford brahti. an thero thiodo thing. quadun that
    
19. sie ni mahtin githoloian ‡· that sie the eno man so· uueldi alla· uue-
    
20. rod faruuinnen. || Than uuisse uualdand krist· thero manno
    
21. so garo· modgithahti. hetigrimmon hugi. huand imu ni uuas
    
22. biholen eouuiht. an thesaru middilgard. He ni uuelde tho
    
23. an thie megin innen· sidur openlico· under that erlo folc· gan-
    
24. gan under thea iudeon. bed the godes sunu· thero torohteon