Page 114

1. galileolande· fan nazarethburg. neriand quami. uuitig uuarsago.
   
2. themu uuerode te helpu. Tho uuas them iudiun· the imu er grame
   
3. uuarun· unholde an hugi. harm an mode. that imu thea liudi so
   
4. filu· lofsang uuarhtun. diurdun iro drohtin. tho gengun dolmode·
   
5. that sie uuid uualdand crist· uuordun sprakun. badun that he that
   
6. gesidi· suigon heti. letti thea liudi. that sie imu lof so filu· uuordun
   
7. ni uuarhtin. It is thesumu uuerode led quadun sie· thesun burgliudiun·
   
8. Tho sprak eft that barn godes. Ef gi sie amerriad quad he· that
   
9. her ni motin manno barn· uualdandes craft· uuordun diurien. than
   
10. sculun it hropen thoh· harde stenos. for thesumu folcskepi· felisos
    
11. starka. er than it eo belibe· neuo man is lof spraka· uuido aftar the-
    
12. saru uuerold. || Tho he an thene uuih innen· geng an that godes hus.
    
13. fand thar iudeono filu. mislike man· manage atsamne· thea im
    
14. thar copstedi· gikoran habdun. mangodun im thar mid manages
    
15. hui. muniterias satun· an themu uuihe innan. habdun iro uuesl
    
16. gidago· garu te gebanne. that uuas themu godes barne· al an andun·
    
17. Dref sie ut thanen· rumo fan themu rakude. quad that uuari rehta-
    
18. ro dad. that thar te bedu forin· barn israheles. endi an thesumu
    
19. minumu huse· helpono biddean. ‡ than her theobas· an thingstedi
    
20. halden. thea faruuarhton uueros· uueh : : driban. unreht enuald.
    
21. Ne gi eniga era ni uuitun· theses godes huses· iudeoliudi. so rumde
    
22. he tho endi rekode· riki drohtin· that helaga hus. endi an helpun
    
23. uuas· managumu mankunnie. them the is mikilon craft· ferrene
    
24. gefrugnun· endi thar gifaran quamun. obar langan uueg. Uuard