Page 64

1. ne mag· handun gehelien. Nu is im thinoro helpono tharf· fromin
   
2. the godo. Tho sprac im eft that fridubarn godes· san aftar thiu· selbo
   
3. tegegnes. quad that he thar quami. endi that kind uueldi· nerean
   
4. af theru nodi. Tho im nahor geng· the man far theru menigi.
   
5. uuid so mahtigna· uuordun uuehslan. Ic thes uuirdig ne bium
   
6. quad he· herro the godo· that thu an min hus cumes. sokeas mina
   
7. selida. huand ic bium so sundig man. mid uuordun endi mid
   
8. uuercun. Ic gelobiu that thu geuuald habas. that thu ina hinana
   
9. maht· helan geuuirkean. uualdand from min· ef thu it mid thinun
   
10. uuordun gesprikis. than is san thiu lefhed losot. endi uuirdid
    
11. is lichamo· hel endi hreni. ef thu im thina helpa fargibis·
    
12. Ic bium mi ambahtman. hebbiu mi odes genog· uuelono ge-
    
13. uunnen. thoh ic undar geuueldi si· adalcuninges. thoh hebbiu
    
14. ic erlo getrost· holde heririneos. thea mi so gehoriga sint. that
    
15. sie thes ne uuord ne uuerc· uuiht ne farlatad· thes ic sie an thesumu
    
16. landskepie· lestean hete. ac sie farad endi frummiad. endi eft
    
17. te iro frohan cumad· holde te iro herron. Thoh ic at minumu
    
18. hus egi· uuidbredene uuelon· endi uuerodes genog· helidos hugi-
    
19. derbie. thoh ni gidar ic thi so helagne· biddien barn godes.
    
20. that thu an min bu gangas· sokeas mina selida· huand ic so
    
21. sundig bium. uuet mina faruurhti.
    
22. Tho sprac eft uualdand crist· the gumo uuid is iungoron·
    
23. quad that hi an iudeon huergin· undar israheles· aboron
    
24. ne fundi· gemacon thes mannes. the io mer te gode· an themu