Page 151

1. thar leddun ina uulanke man· erlos undar ederos. thar uuas
   
2. eld mikil. fiur an fridhobe· themu folke tegegnes. geuuarht for
   
3. themu uuerode. thar gengun sie im uuermien to. iudeoliudi. letun
   
4. thene godes sunu· bidon an bendiun. uuas thar braht mikil. gelmo-
   
5. digaro galm. Iohannes uuas er· themu heroston cud. be thiu moste
   
6. he an thene hof. innan thringan mid theru thiod. || Stod allaro
   
7. thegno bezto· petrus thar ute. ni let ina the portun uuard· folgon
   
8. is froen. er it at is friunde abad. iohannes at enumu iudeon. that man
   
9. ina gangan let. ford an thene fridhof. thar quam im en fekni uuif.
   
10. gangan tegegnes. thiu enas iudeon uuas· iro theodanes thiuu· endi
    
11. tho te themu thegne sprac. magad unuuanlic. Huat thu mahtis
    
12. man uuesan quad siu· iungaro fan galilea. thes the thar genouuer
    
13. sted. fadmun gifastnod. Tho an forhtun uuard· simon san·
    
14. slac an is mode. quad that he thes uuibes· uuord ni bikonsti. ni thes
    
15. theodanes· thegan ni uuari· med is tho for theru menegi. quad that
    
16. he thena man ni antkendi. ni sind mi thine sidi kude quad he. uuas
    
17. imu thiu craft godes. thea herdislo fan themu hertan· huarabondi.
    
18. Geng ford undar themu folke. antat he te themu fiure quam. gi-
    
19. uuet ina tho uuarmien. Thar im ok en uuif bigan· felgian firin-
    
20. spraka. Her mugun gi quad siu an iuuan fiund sehan. thit is
    
21. gegnungo· giungaro kristes. is selbes gesid. Tho gengun imu san
    
22. aftar thiu· nahor nidhuata. endi ina niudlico· fragodun fiundo
    
23. barn· huilikes he folkes uuari. Ni bist thu thesoro burgliudio. that
    
24. mugun uui an thinumu gibarie gisehan. an thinun uuordun