Page 155

1. bethihan man. He thagoda endi tholoda. ni sprak imu io thiu
   
2. thiod so uilu· thea liudi mid luginun. that he it mid ledun an-
   
3. gegin· uuordun uurachi. || Tho thar undar themu uuerode ares·
   
4. baluhugdig man· biscop thero liudio. the furisto thes folkes.
   
5. endi fragode krist. Iac ina be imu selbon bisuor. suithon ethun.
   
6. grotte ina an godes namon. endi gerno bad· that he im that gi-
   
7. sagdi. ef he sunu uuari· thes libbiendies goden godes. thes thit
   
8. lioht gescop. krist cuning euuig. uui ni mugun is antkiennien
   
9. uuiht. ne an thinun uuordun ni an thinun uuerkun. || Tho sprak
   
10. imu eft the uuaro angegin. the godo godes sunu. Thu quidis
    
11. it for thesun iudeon nu· sodlico segis· that ik it selbo bium. thes ni
    
12. gilobiad mi these liudi. Ni uuilliad mi forlatan be thiu. ni sind im
    
13. min uuord uuirdig. Nu seggiu ik iu te uuarun thoh. that gi noh
    
14. sculun sittien gisehan· an the suidaron half godes· marean mannes
    
15. sunu· an megincrafte· thes alouualden fater. endi thanan eft
    
16. kuman· an himiluuolcnun herod. endi allumu helido cunnie· mid
    
17. is uuordun adelien. al so iro geuurhti sind. || Tho balg ina the biscop·
    
18. habde bittren hugi. uuredida ‡ uuid themu uuorde. endi is giuuadi
    
19. slet. brak for is breostun. Nu ni durbun gi hidan leng quad he·
    
20. thit uuerod geuuitscepies. nu im sulic uuord farad· menspraca fan
    
21. is mude. that gihorid her nu manno filu. rinko an thesumu rakude·
    
22. that he ina so rikean telit. gihid that he god si. huat uuilliad gi iudeon
    
23. thes· adelien te dome· is he dodes sunu· uuirdig be sulicun uuordun?
    
24. That uuerod al gesprac· folc iudeono. that he uuari tho thes ferhes scolo.