Heliand In Old Saxon
Heliand In Old Saxon
Page 170
Chr. a Josepho Arimathaeo sepelitur. Judaeorum providentia
Matth. XXVII. 57 – 64. Marc. XV. 42 – 47. Luc. XXIII. 50 – 55. Joh. XIX. 38 – 41.
- (LXVIII.) So thuo gisegid
uuarth· sedle nahor· hedra sunna· mid
- hebantunglon· an them
druoben dage· thuo geng im uses drohtines
- thegan· uuas im glau
gumo· iungro cristes· managa huila· so it thar
- manno filo· ne uuissa
te uuaron· huand hie it mid is uuordon hal· iudeno
- gumscipie· ioseph uuas
hie hetan· darnungo uuas hie uses drohtines
- iungro· hie ni uuelda
thero farduanun thiod· folgol te enigon firinuuercon·
- ac hie bed im under them
folke iudeono· helag himilo rikies· Hie geng
- im thuo uuid thena heritogon
mahlian· thingon uuid thena thegan kesures·
- thigida ina gerno· that
hie muosti alosian· thena likhamon· cristes fan
- themo crucie· thie thar
giquelmid stuod· thes guoden fan them galgen· endi
- an graf leggian· foldu
bifelahan· Im ni uuelda thie folctogo thuo· uuernian
- thes uuillien· ac im
giuuald fargaf· that hie so muosti gifrummian·
- Hie giuuet im thuo forth
thanan· gangan te them galgon· thar hie
- uuissa that barn godes·
hreo hangondi· herron sines· Nam ina thuo an
- thero niuuun ruodun·
endi ina fan naglon atuomda· antfeng ina mid is
- fathmon· so man is frohon
scal· liobes lichamon· endi ina an line biuuand·
- Druog ina diurlico· so
uuas thie drohtin uuerth· thar sia thia stedi
- habdun· an enon stene
innan· handon gihauuuan· thar gio helitho barn·
- gumon ne bigruobun· thar
sia that barn godes· te iro landuuisu· lico helgost·
- foldu bifulhun· endi
mid enu felisu belucun· allaro grabo guodlicost·
- Griotandi satun· idisi
armscana· thia that all forsauun· thes gumen grimman
- dod· Giuuitun thuo gangan
thanan· uuopiandi uuib· endi uuara namun·
- huo sia eft te them grabe·
gangan mahtin· Habdun im farseuuana· sorogia
- ginuogia· mikila muodkara·
maria uuarun sia hetana· idisi armscapana·
- Thuo uuarth aband cuman·
naht mid neflu· Nithfolc iudeono uuarth·
- an moragan eft· menigi
gisamnod· rekidun an runon· Huat thu uuest
- huo thit riki uuas· thuru
thesan enan man· all gituiflid. uuerod giuuorran·
- Nu ligid hie uuundon
siok· diopa bidolban· Hie sagda simnen that hie
- scoldi fan dode astandan·
an thriddian dage· Thius thiod gilobit te filo·
- thit uuerod after is
uuordon· Nu thu hier uuardon het· obar them grabe
- gomian· that ina is iungron
thar· ne farstelan an themo stene· endi
- seggian than that hie
astandan si· riki fan raston· Than uuirthit thit rinco
- folc· mer gimerrid· ef
sia biginnat marian hier·
- Thuo uuurthun thar giscerida·
fan thero scolu iudeono· uueros te thero
<< Previous Page Next Page >>
© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries can be sent to info@northvegr.org. Northvegr™ and the Northvegr symbol are trademarks and service marks of the Northvegr Foundation.
|