Maxims II
Verse Indeterminate Saxon


Cyning sceal rice healdan.      Ceastra beoð feorran gesyne,
orðanc enta geweorc,      þa þe on þysse eorðan syndon,
wrætlic weallstana geweorc.      Wind byð on lyfte swiftust,
þunar byð þragum hludast.      þrymmas syndan Cristes myccle,

5

wyrd byð swiðost.      Winter byð cealdost,
lencten hrimigost      (he byð lengest ceald),
sumor sunwlitegost      (swegel byð hatost),
hærfest hreðeadegost,      hæleðum bringeð
geres wæstmas,      þa þe him god sendeð.

10

Soð bið switolost,      sinc byð deorost,
gold gumena gehwam,      and gomol snoterost,
fyrngearum frod,      se þe ær feala gebideð.
Weax bið wundrum clibbor.      Wolcnu scriðað.
Geongne æþeling sceolan      gode gesiðas

15

byldan to beaduwe      and to beahgife.
Ellen sceal on eorle,      ecg sceal wið hellme
hilde gebidan.      Hafuc sceal on glofe
wilde gewunian,      wulf sceal on bearowe,
earm anhaga,      eofor sceal on holte,

20

toðmægenes trum.      Til sceal on eðle
domes wyrcean.      Daroð sceal on handa,
gar golde fah.      Gim sceal on hringe
standan steap and geap.      Stream sceal on yðum
mencgan mereflode.      Mæst sceal on ceole,

25

segelgyrd seomian.      Sweord sceal on bearme,
drihtlic isern.      Draca sceal on hlæwe,
frod, frætwum wlanc.      Fisc sceal on wætere
cynren cennan.      Cyning sceal on healle
beagas dælan.      Bera sceal on hæðe,

30

eald and egesfull.      Ea of dune sceal
flodgræg feran.      Fyrd sceal ætsomne,
tirfæstra getrum.      Treow sceal on eorle,
wisdom on were.      Wudu sceal on foldan
blædum blowan.      Beorh sceal on eorþan

35

grene standan.      God sceal on heofenum,
dæda demend.      Duru sceal on healle,
rum recedes muð.      Rand sceal on scylde,
fæst fingra gebeorh.      Fugel uppe sceal
lacan on lyfte.      Leax sceal on wæle

40

mid sceote scriðan.      Scur sceal on heofenum,
winde geblanden,      in þas woruld cuman.
þeof sceal gangan þystrum wederum.      þyrs sceal on fenne gewunian
ana innan lande.      Ides sceal dyrne cræfte,
fæmne hire freond gesecean,      gif heo nelle on folce geþeon

45

þæt hi man beagum gebicge.      Brim sceal sealte weallan,
lyfthelm and laguflod      ymb ealra landa gehwylc,
flowan firgenstreamas.      Feoh sceal on eorðan
tydran and tyman.      Tungol sceal on heofenum
beorhte scinan,      swa him bebead meotud.

50

God sceal wið yfele,      geogoð sceal wið yldo,
lif sceal wið deaþe,      leoht sceal wið þystrum,
fyrd wið fyrde,      feond wið oðrum,
lað wið laþe      ymb land sacan,
synne stælan.      A sceal snotor hycgean

55

ymb þysse worulde gewinn,      wearh hangian,
fægere ongildan      þæt he ær facen dyde
manna cynne.      Meotod ana wat
hwyder seo sawul sceal      syððan hweorfan,
and ealle þa gastas      þe for gode hweorfað

60

æfter deaðdæge,      domes bidað
on fæder fæðme.      Is seo forðgesceaft
digol and dyrne;      drihten ana wat,
nergende fæder.      Næni eft cymeð
hider under hrofas,      þe þæt her for soð

65

mannum secge      hwylc sy meotodes gesceaft,
sigefolca gesetu,      þær he sylfa wunað.