The Paris Psalter: Psalm 107
Verse Indeterminate Saxon


Ys min heorte gearu,      halig drihten,
gearu is min heorte,      þæt ic gode cweme,
sealmas singe      soþum drihtne.
Aris nu, wuldur min,      þæt ic wynlice

5

on psalterio      þe singan mote,
and ic ðe on hleoðre      hearpan swylce
on ærmergen      eac gecweme.
Ic þe andette,      ece drihten,
on folca gehwam      fægrum wordum,

10

and ic þe on ðeodum      on þanc mote
sealmas singan      swyþe geneahhe.
Is þin mildheort mod      mycel oð heofenas
ahafen healice      ofer hæleða bearn;
ys þin soðfæstnes      seted oþ wolcen.

15

Ahafen þu eart ofer heofenas,      halig drihten;
is wuldur ðin      wide swylce
ofer þas eorðan      ealle mære,
and þine þa gecorenan wesan      clæne and alysde.
Do me þin swyðre hand      swylce halne

20

and me gehyre,      hælynd drihten,
þe on halgum spreceð      her on eorðan:
"And ic blissige,      bu gedæle,
þa selegesceotu,      þa on Sycimam nu
and on Metibor      mære standað.

25

Min is Galaad,      gearwe Mannases,
is Effrem his      agen broður
efne heah strengðu      heafdes mines.
Ic me to cyninge      cenne Iudas,
syndan me Moabitingas      magas swylce;

30

ic Idumea      ealle cenne
and min gescy þyder      sendan þence;
syndan me fremde cynn      fæste underþeoded."
Hwylc gelædeð me      on lifes byrig
fæste getrymede,      þæt ic forð þanon

35

on Idumea wese      eft gelæded?
Hwæt, þu eart se sylfa god,      þe us synnige iu
adrife fram dome;      ne do þu æfre swa,
þæt þu of urum mægene      mod acyrre.
Syle us on earfoðum      æþelne fultum;

40

forþon hælu byð      her on eorðan
manna gehwylces      mægene idel.
Us sceal mægenes gemet      mihtig drihten
soðfæst syllan,      and he sona mæg
ure feond gedon      fracuþe to nawihte.