The Paris Psalter: Psalm 64
Verse Indeterminate Saxon


þe gedafenað,      drihten user,
þæt þe man on Sion      swyðe herige
and on Hierusalem      gylde and gehate.
Gehyr min gebed,      halig drihten,

5

for ðe sceal ælc flæsc      forð siðian.
Synfulra word      swyþe ofer usic
fræcne foran;      þu gefultuma
urum misdædum,      mihta wealdend.
He weorðeð eadig,      se þe hine ece god

10

cystum geceoseð      and hine clæne hafað,
and on his earduncgstowum      eardað syððan.
Ealle we ðin hus      ecum godum
fægere fyllað;      fæste is þin templ
ece and wræclic      awa to feore.

15

Gehyr us, hælend god,      þu eart hyht ealra
þe on ðysse eorðan      utan syndon
oþþe feor on sæ      foldum wuniað.
þinre mihte sculon      muntas hyran,
swylce þu gedrefest      deope wælas

20

þæt byð ormætum      yþa hlude
and hi uneaðe mæg      ænig aræfnan.
þeoda him ondrædað      þinne egesan,
þe eard nymað      utan landes;
for þinum wundrum      forhte weorðað.

25

ærmorgenes gancg      wið æfentid
ealle þa deman      drihten healdeð;
eorðan ðu gefyllest      eceum wæstmum,
þæt heo welig weorþeð      wera cneorissum.
Beoð godes streamas      gode wætere

30

fæste gefylde,      þanan feorhnere
findað foldbuend,      swa him fægere oft
gegearewadest,      god lifigende.
Wæter yrnende      wæstme tyddrað;
mænige on moldan      manna cynnes

35

on cneorisse      cende weorðað,
and blissiað,      blowað and growað
þurh dropunge      deawes and renes.
þonne þu geares hring      mid gyfe bletsast
and þine fremsumnesse wylt      folcum dælan,

40

þonne beoð þine feldas      fylde mid wæstmum.
þonne on wæstmum      weorðað mæsted,
and mid wynngrafe      weaxað geswiru.
Hi beoð gegyrede      godre wulle,
eowdesceapum;      cumað eadilic

45

wæstm on wangas      weorðlic on hwætum;
þonne hi cynlice to ðe      cleopiað sona,
and þe þonne lustum      lofe þanciað.