Page 147

1. iudeon aftar sigun. fiundo folcscepi· drog man fiur an gimang.
   
2. logna an liohtfatun. ledde man faklon. brinnandea fan burg. thar
   
3. sie an thene berg uppan. stigun mid stridu. thea stedi uuisse iudas
   
4. uuel. huar he thea liudi to· ledean scolde. Sagde imu tho te tekne.
   
5. tho sie thar to forun. themu folke bi uoran. te thiu that sie ni farfen-
   
6. gin thar· erlos odren man. Ik gangu imu at erist to quad he. cussiu
   
7. ine endi queddiu. that is crist selbo. thene gifahen sculun· folco craftu.
   
8. binden ina uppan themu berge. endi ina te burg hinan. ledien un-
   
9. dar thea liudi. he is libes habad· mid is uuordun faruuerkod. || Uue-
   
10. rod sithode tho. antat sie te criste· kumane uurdun. grimfolc iudeo-
    
11. no. thar he mid is iungarun stod. mari drohtin. bed metodo giscapu·
    
12. torhtero tideo. Tho geng imu treulos man. iudas tegegnes. endi
    
13. te themu godes barne. hneg mid is hobdu. endi is herron quedde.
    
14. custe ina craftagne. endi is quidi leste. uuisde ina themu uuero-
    
15. de. al so he er mid uuordun gehet. That tholode al mid githul-
    
16. diun. thiodo drohtin. uualdand thesara uueroldes. endi sprak imu
    
17. mid is uuordun to. fragode ine frokno. Be hui kumis thu so
    
18. mid thius folcu te mi. be hui ledis thu mi so these liudi to. ‡ thesare
    
19. ledan thiode. farcopos mid thinu kussu. under thit kunni iudeo-
    
20. no. meldos mi te thesaru menegi. Geng imu tho uuid thea man
    
21. sprekan. uuid that uuerod odar. endi sie mid is uuordun fragn.
    
22. huene sie mid thiu gesidiu· sokean quamin. so niutlico an naht.
    
23. so gi uuillead nod frummien. manno huilicumu. Tho sprak
    
24. imu eft thiu menegi angegin. quadun that im heleand thar. an