Page 123

1. uuif uueldun· uuordun frubrean. that sie so ni karodin· kind iungas
   
2. dod. lazaruses farlust. So tho the landes uuard. geng an thiu
   
3. gardos. so uurdun thes godes barnes. kumi thar gikudid. that he
   
4. so craftig uuas· bi theru burg uten. Tho im bediun uuas· them uuibun
   
5. sulik uuillio· that sie im uualdand krist to· that fridubarn godes.
   
6. farandien uuissun. (XLIX.) Tho them uuibun uuas· uuilleono mesta·
   
7. cumi drohtines. endi cristes uuord· te gihorienne. Heouandi geng·
   
8. martha modkarag· uuid so mahtigne· uuordun uuehslan. endi
   
9. uuid uualdand sprak. an iro hugi hriunig. Thar thu mi herro
   
10. min quad siu. neriendero bezt. nahor uuaris. heleand the godo.
    
11. than ni dorfli ik sulic harm tholon. bittra breostkara. than ni
    
12. uuari nu min broder dod· lazarus fan thesumu liohte. ac he imu
    
13. mahti libbien ford. ferahes gefullid. Ik thoh fro min te thi· liohto
    
14. gilobiu. leriandero bezt. so hues so thu biddien uuili· berhton droh-
    
15. tin. that he it thi san fargibid. god alomahtig. giuuerdot thinan
    
16. uuillean. Tho sprak eft uualdand krist. theru idis anduuordi.
    
17. Ni lat thu thi an innan thes quad he. thinan suebon suerkan.
    
18. Ik thi seggian mag· uuarun uuordun. that thes nis giuuand enig·
    
19. nebu thin broder scal· thurh gibod godes. thurh drohtines craft·
    
20. fan dode astanden. an is lichamon. All hebbiu ik gilobon so
    
21. quad siu· that it so giuuerden scal. so huan so thius uuerold endiod.
    
22. endi the mareo dag· obar man ferid. that he than fan erdu scal· up
    
23. astanden. an themu domos daga. than uuerdad fan dode quica.
    
24. thurh maht godes· mankunnies gehuilic· arisad fan restu.