The Complete Corpus of Anglo-Saxon Poetry
The Paris Psalter: Psalm 131
Verse Indeterminate Saxon
Gemune þu, drihten, mærne Dauid
and ealle his mannþwærnesse micle and goode.
Swa ic æt frymðe geswor ferhðe wið
drihten
and gehat gehet, he geheold teala
5
wið Iacobes god þone mæran.
þeah þe ic on mines huses hyld gegange
oþþe selegesceot þænne swæs
wese
oððe on min restbedd ricene gestige,
Gif ic minum eagum unne slæpes,
10
oþþe minum breawum beode hnappunga,
oþþe ic on þunwange þriste
gereste,
Oþþæt ic gemete mære stowe
drihtne gecorene, dyre selegesceot
Iacobes gode georne gecweme.
15
Efne we þas eall on Eufraten
sæcgean gehyrdon, syððan gemitton
forwel manegu on wudufeldum.
We on his selegesceot swylce gangað,
and þære stowe stede ariað
20
þær his fotas ær fæste gestodan.
Aris on þinre reste recene, drihten;
þu earce eart eallhaligra.
Synd þine sacerdas on soðfæstnesse
gode gegierede, and gleawe nu
25
þine þa halgan her blissiað.
For þinum agenum esne swylce,
deorum Dauide, þu ne do æfre,
þæt þu andwlitan ut oncyrre
þines þæs halgan her on eorðan.
30
þæs deopne að drihten aswor
and þone mid soðe swylce getrymede,
þæt he hine for hole ær ne aswore,
gehet Dauide, swa he him dyde syþþan,
þæt he weorðlicne wæstm gesette
35
þe of his innaðe agenum cwome,
ofer þin heahsetl; gif nu healdað well
þines sylfes bearn soðe
treowa
and þa gewitnesse, þe
ic hig wel lære,
þonne hiora suna swylce motan
40
a þysse worulde wynnum brucan
and on þinum setle sittan geneahhe.
Forðon him Sione geceas sylfa drihten,
and him to earde geceas ærest æt frymðe.
þis is min rest, þe ic recene nu
45
on worulda woruld wunian þence,
þær ic eard nime, forðon ic hi ær
geceas.
His wuduan ic wordum bletsige
and gesegnade, sylle geneahhe
heora hungrium hlaf to fylle.
50
Ec his sacerdas swylce mid hælu
georne gegyrwe, and gode eac
his þa halgan her habbað blisse.
þær ic Dauides horn deorne bringe,
forð gelæde, fægre gearuwe
55
byrnende blacern, bere for minum
criste gecorenum, þe ic hine cuðne wat.
Ic his feondas eac facne gegyrwe
mid scame swiðust; ofer hine scir cymeð
minra segnunga soðfæst blostma.
<< Previous Page Next
Page >>
© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries
can be sent to info@northvegr.org.
Northvegr™ and the Northvegr symbol are trademarks and service marks
of the Northvegr Foundation.
|