The Complete Corpus of Anglo-Saxon Poetry
The Paris Psalter: Psalm 83
Verse Indeterminate Saxon
Synd me wic þine weorðe and leofe,
mægena drihten; a ic on mode þæs
willum hæfde, þet ic him wunude onn.
Heorte min and flæsc hyhtað georne
5
on þone lifigendan leofan drihten;
him eac spedlice spearuwa hus begyteð,
and tidlice turtle nistlað,
þær hio afedeð fugelas geonge.
Wærun wigbedu þin, weoruda drihten;
10
þu eart drihten min and deore cynincg.
Eadige weorðað, þa þe eardiað
on þinum husum, halig drihten,
and þe on worulda woruld, wealdend, heriað.
þæt byð eadig wer, se þe him
oðerne
15
fultum ne seceð nymþe fælne god,
and þæt on heortan hige healdeð fæste,
geseteð him þæt sylfe on ðisse
sargan dene,
þær hi teara teonan cnyssað
on þam sylfan stede þe þu him settest
her.
20
Brohte him bletsunge se ðe him beorhte æ
soðe sette; syþþan eodan
of mægene on mægen; þær wæs
miht gesawen
on Sionbeorge soðes drihtnes.
Gehyr min gebed, halig drihten,
25
þu eart mære god, mildum earum,
and Iacobes god se mæra.
Beseoh drihten nu, scyldend usser;
oncnaw onsyne cristes þines.
Betere is micle to gebidanne
30
anne dæg mid þe þonne oðera
on þeodstefnum þusend mæla.
Ic me þæs wyrce and wel ceose,
þæt ic hean gange on hus godes,
þonne ic on fyrenfulra folce eardige.
35
Forþon god lufað geornast ealles,
þæt man si mildheort mode soðfæst,
þonne him god gyfeð gyfe and wuldur.
Nele god æfre gode bedælan,
þa ðe heortan gehygd healdað clæne;
40
þæt bið eadig mann, se þe him
ecean godes
to mundbyrde miht gestreoneð.
<< Previous Page Next
Page >>
© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries
can be sent to info@northvegr.org.
Northvegr™ and the Northvegr symbol are trademarks and service marks
of the Northvegr Foundation.
|