The Complete Corpus of Anglo-Saxon Poetry
The Paris Psalter: Psalm 75
Verse Indeterminate Saxon
God wæs geara cuð mid Iudeum,
and his æþele nama mid Israelum.
Is on sibbe his stow soþe behealden,
and he on Sione swylce eardað.
5
þær he hornbogan hearde gebendeð,
and sweord and sceld æt gescotfeohta.
þu wræclice wundrum onlyhtest
fram þam eceum hider æðelum beorgum;
ealle synt yrre, þa þe unwise
10
heora heortan hige healdað mid dysige;
hi slæp hiora swæfun unmurne;
ne þær wiht fundan, þa þe welan
sohtan,
þæs þe hi on handum hæfdan
godes.
For þinre þrea þriste ongunnon,
15
Iacobes god, georne slepan,
þa þe on horsum hwilon wæron;
is þin egesa mycel; hwylc mæg æfre
þe,
gif þu yrre byst, ahwær wiðstandan?
þonne þu of heofenum dom hider on eorþan
20
mid gescote sendest, þonne hio swyþe beofað;
ðonne to dome drihten ariseð,
þæt he on eorðan do ealle hale
þe he mildheorte meteð and findeð.
Forþon ðe mannes geþoht mægen
andetteð,
25
and þonne þa lafe lustum þence,
þæt ic þe symbeldæg
sette and gyrwe.
Gehatað nu drihtne, and him hraðe gyldað
eowrum þam godan gode georne;
ealle þe on ymbhwyrfte ahwær syndan,
30
him gyfe bringen gode and clæne.
To þam egsan sceal æghwylc habban,
þe wera gastum wealdeð and healdeð;
eorðcynincgum se ege standeð.
<< Previous Page Next
Page >>
© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries
can be sent to info@northvegr.org.
Northvegr™ and the Northvegr symbol are trademarks and service marks
of the Northvegr Foundation.
|