The Paris Psalter: Psalm 67
Verse Indeterminate Saxon


Arise god,      ricene weorðe
his feonda gehwylc      fæste toworpen;
fleoð his ansyne,      þa þe hine feodan ær.
Rece hi gelicast      ricene geteoriað;

5

swa fram fyre weax      floweð and mylteð,
swa þa fyrenfullan      frecne forweorðað;
habbað soðfæste      symbel ece.
Hi ansyne      ecean drihtnes
habbað beorhtlice      blisse and sibbe.

10

Singað soðum gode      sealmas geneahhige,
and his naman swylce      neode heriað;
doð siðfæt þæs      seftne and rihtne,
þe he sylfa astah      ofer sunnan up,
þam is to naman      nemned drihten.

15

Wesað ge on his gesyhþe      symble bliðe,
and on his ansyne wesan      ealle gedrefde,
þa þe wydewum syn      wraðe æt dome
oþþe steopcildum wesen      strange fæderas.
Drihten is on his stowe      dema halig,

20

se þe eardian deð      anes modes
and on hiora huse      healdeð blisse;
Se þe on his mægenes      mihte gelædeð
þæt he þa gehæftan      hæleð sniome,
and þa to yrre beoð      ealle gecigde

25

and eardiað      on eorðscræfum.
þonne god gangeð      for his þæt gleawe folc,
oððe geond westena      wide ferað,
þanon eorðe byð      eall onhrered.
For ansyne      ecean drihtnes

30

heofenas droppetað;      hrusan forhtiað
for Israela godes      egesan þrymme.
Wilsumne regn      wolcen brincgeð,
and þonne ascadeð god      sundoryrfe;
eall þu þa gefremest      þurh þine fæste miht.

35

þine wihte on þam      wynnum lifiað;
þu þin swete good      sealdest þearfum.
God gifeð gleaw word      godspellendum,
syleð him modes mægen      se þe is mihtig kynincg
and wlites wealdend;      oft weorðlic reaf

40

on huse men      her gedælað.
Gif ge slæpað      samod on clero,
fiðeru beoþ culfran      fægeres seolfres
and hire bæc scineð      beorhtan golde.
þonne hi se heofonlica kynincg      her toscadeð,

45

syþþan hi on Selmon      snawe weorðað.
Gebeorh godes      bringeð to genihte
wæstme weorðlice      and wel þicce.
Forþon ge onfoð      fægerum beorge,
þær ge to genihte      geniomað wæstme;

50

se is wealdendgode      wel liciendlic,
on þam wið ende      eardað drihten.
Wærun godes cræta      gegearwedra
tyn þusendo      geteled rime,
mænigfeald þusend      modblissiendra.

55

Drihten is on þam      dædum spedig;
on heanesse astah,      hæftned lædde,
þa on hæftnede      hwile micele
lange lifdon,      and wæs lacgeofa
ofer middangeard      manna bearnum.

60

Ne magon þær eard niman      ungeleafe menn;
wese of dæge on dæg      drihten user,
se goda god,      georne gebletsad.
Sylle us gesundne      siðfæt drihten;
ure hælend god      helpe usser

65

and us æt deaðe eac      drihten gehealde.
Hwæðere wealdend god      wiðhycgendra
heafdas feonda      her gescæneð,
and he tofylleð      feaxes scadan
þara þe her on scyldum      swærum eodon.

70

Of Basan, cwæð      bealde drihten,
ic me on sæ deopre      sniome onwende,
oþþæt þin fot weorðe      fæste on blode.
Hundes tungan      habbað feondas,
from þam þine gangas      wæron gesewene;

75

wærun godes mines      gangas rihte,
soðes kynincges      symble on halgum.
þyder ealdormen      ofstum coman,
and gegaderade      gleowe sungon
on þæra manna      midle geongra

80

on tympanis      togenum strengum,
and on ciricean      Crist, drihten god
bealde bletsige      bearn Israela.
þær Benniamines synt      bearn on geogoðe
and ealdormenn      eac of Iudan,

85

þe latteow wæs      forð þara leoda,
and ealdras eac      of Zabulone
and Neptalim      niode swylce.
Bebeod þinum mægene;      þu eart mihtig god;
and þin weorc on us      mid wisdome

90

getryme on þinum temple      tidum gehalgod;
þæt ys on Hierusalem,      þyder ðe gyfe lædað
of feorwegum      foldan kynincgas.
On wuda þu wildeor      wordum þreatast
and fearra gemot      under folcum;

95

ne beoð ut fram þe      æfre atynde,
þa þe seolfres beoð      since gecoste.
Toweorp þu þa ðeoda