Northvegr - Easy Readings In Old Icelandic

Home | Site Index | Heithinn Idea Contest |

Easy Readings In Old Icelandic

Chapter 55

The Baptism Of Olaf Tryggvason

Ólafr Tryggvason, þá er hann lá í Syllingum, spurði hann, at þar í eyjunni var spámaðr nökkurr, sá er sagði fyrir úorðna hluti, ok þótti mörgum mönnum þat mjök eptir ganga. Gørðist Ólafi forvitni á at reyna spádóm manns þess. Hann sendi þann af mönnum sínum, er fríðastr var ok mestr, ok bjó hann sem vegligast, ok bað hann segja, at hann væri konungr; því at Ólafr var þá frægr orðinn af því um öll lönd, at hann var fríðari ok göfugligri ok meiri en allir menn aðrir. En er sendimaðr kom til spámannsins ok sagðisk vera konungr, þá fekk hann þessi andsvör: "Eigi ertu konungr, en þat er ráð mitt, at þú sér trúr konungi þínum." Ekki sagði hann fleira þessum manni. Fór sendimaðr aptr og sagði Ólafi, ok fýsti hann þess at meir at finna þenna mann, er hann heyrði slík andsvör hans, ok tók nú ifa af honum, at hann væri eigi spámaðr. Fór þá Ólafr á hans fund ok átti tal við hann, ok spurði eptir hvat spámaðr segði Ólafi frá, hvernug honum mundi ganga til ríkis eða annarrar hamingju. Einsetumaðrinn svarar með helgum spádómi: "Þú munt verða ágætr konungr ok ágæt verk vinna; þú munt mörgum mönnum til trúar koma ok skírnar, muntu bæði þér hjálpa í því ok mörgum öðrum; ok til þess at þú ifir eigi um þessi mín andsvör, þá máttu þat til marks hafa: þú munt við skip þín svikum mœta ok flokkum, ok mun á bardaga rœtask, ok muntu týna nökkuru liði ok sjálfr sár fá, ok muntu af því sári banvænn verða ok á skildi til skips borinn, en af þessu sári muntu heill verða innan sjau nátta, ok brátt við skírn taka." Síðan fór Ólafr ofan til skipa sinna, ok þá mœtti hann þar úfriðarmönnum, þeim er hann vildu drepa ok lið hans, ok fóru þeira viðskipti sem einsetumaðr hafði sagt honum, at Ólafr varð sárr borinn á skip út, ok svá at hann var heill á sjau nóttum. Þóttisk Ólafr þá vita, at þessi maðr mundi honum sanna hluti sagt hafa, ok þat at hann var sannr spámaðr, hvaðan af sem hann hafði þann spádóm. Fór þá Ólafr annat sinn at finna þenna mann, talaði þá mart við hann, spurði vendiliga, hvaðan honum kom sú speki, er hann sagði fyrir úorðna hluti. Einsetumaðr sagði, at sjálfr guð kristinna manna lét hann vita alt þat er hann forvitnaðisk; sagði þá Ólafi mörg stórmerki guðs, ok af þeim fortölum játti Ólafr at taka skírn. Ok svá var, at Ólafr var skírðr þar ok alt föruneyti hans. Dvalðisk hann þar mjök lengi ok nam rétta trú, ok hafði þaðan með sér presta ok aðra lærða menn.

andsvar, n. answer			rœtask, to land in
ágætr, famous (14, 23)			sannr, true
banvænn, likely to die			sár, n. wound
dvalðisk, remained (dveljask)			segja fyrir, to foretell
einsetumaðr, m. hermit			skírn, f. baptism
eptir ganga, to come to pass			spádómr, m. prophetic power
flokkr, f. band, troop			spámaðr, m. spaeman, seer
fortala, f. representation			speki, f. wisdom
forvitnask, to desire to know			stórmerki, n. miracle
forvitni, f. curiosity			svik, n. treachery
fríðr, handsome (34)			Syllingar, f. Scilly Islands
frægr, famous (24)			tal, n. talk
föruneyti, n. company			tala, to talk
göfugligr, stately			trú, f. faith
hamingja, f. fortune			trúr, faithful
heill, whole			týna, to lose
ifi, m. doubt			úfriðarmaðr, m. enemy
ifa, to doubt			úorðinn, not yet happened
játta, to consent (49)			vegliga, splendidly
lærðr, learned			vendiliga, closely
reyna, to try, test			viðskipti, n. dealing

<< Previous Page Next Page >>

© 2004-2007 Northvegr.
Most of the material on this site is in the public domain. However, many people have worked very hard to bring these texts to you so if you do use the work, we would appreciate it if you could give credit to both the Northvegr site and to the individuals who worked to bring you these texts. A small number of texts are copyrighted and cannot be used without the author's permission. Any text that is copyrighted will have a clear notation of such on the main index page for that text. Inquiries can be sent to info@northvegr.org. Northvegr™ and the Northvegr symbol are trademarks and service marks of the Northvegr Foundation.